தமிழக வெற்றிக் கழக (TVK) தலைவரும் நடிகருமான விஜய், மதுரை மாநாட்டில் முதன்முறையாக அதிமுகவை கடுமையாக விமர்சித்து, பாஜகவுடன் கூட்டணியில் இருக்கும் எந்தக் கட்சியுடனும் தனது கட்சி கூட்டணி வைக்காது என தெளிவுபடுத்தினார்.
“புரட்சித்தலைவர் எம்ஜிஆர் தொடங்கிய அதிமுக இப்போது யாரிடம் இருக்கிறது? எப்படிப்பட்டவர்களிடம் உள்ளது? இதனால் உண்மையான அதிமுக தொண்டர்கள் மனம் வெறுத்து, புலம்புகின்றனர். அவர்களுக்கு யாருக்கு வாக்களிக்க வேண்டும் என தெரியும்,” எனக் கூறி, மறைமுகமாக அதிமுக தொண்டர்களை TVKவுக்கு ஆதரவாக வாக்களிக்க அழைப்பு விடுத்தார்.
இதற்கு பதிலளித்த அதிமுக பொதுச்செயலாளரும் எதிர்க்கட்சித் தலைவருமான எடப்பாடி கே. பழனிசாமி, ‘மக்களை காப்போம், தமிழகத்தை மீட்போம்’ பயணத்தின்போது காட்டமாக பதிலடி கொடுத்தார்.
“அதிமுக இப்போது யாரிடம் இருக்கிறது என தெரியாமல், அறியாமையில் சிலர் பேசுகிறார்கள். எம்ஜிஆர் வளர்த்த, வழிகாட்டிய ஒரு சாதாரண தொண்டனான நான் இன்று அதிமுகவை வழிநடத்துகிறேன்.
தான்தோன்றித்தனமாக வாய்க்கு வந்ததை பேசுவோர், இங்கு நிற்கும் அதிமுக தொண்டர்கள், அனுதாபிகளின் மனநிலையை புரிந்துகொள்ள வேண்டும். அவர்களை தலைவராக ஏற்ற கட்சியும், தொண்டர்களும் எப்படி இருப்பார்கள் என உங்களுக்கு விட்டுவிடுகிறேன்,” என்று கூறி, விஜய்யின் விமர்சனத்தை கட்சி அளவில் திருப்பினார்.
விஜய்யின் கருத்து, பாஜகவுடனான அதிமுக கூட்டணியை கேள்விக்கு உட்படுத்தி, தமிழக அரசியலில் பரபரப்பை ஏற்படுத்தியுள்ளது. பழனிசாமியின் பதிலடி, அதிமுகவின் தலைமை மற்றும் தொண்டர்களின் ஒற்றுமையை வலியுறுத்தி, 2026 சட்டமன்றத் தேர்தலுக்கு முன் அரசியல் களத்தை மேலும் சூடாக்கியுள்ளது.
