Related Articles
தமிழகத்தில் பரபரப்பை ஏற்படுத்திய கிட்னி திருட்டு மற்றும் சட்டவிரோத சிறுநீரக விற்பனை வழக்கின் விசாரணை மீண்டும் தீவிரப்படுத்தப்பட்டுள்ளது. தேர்தல் காலத்தில் தற்காலிகமாக மந்தமான நிலையில் இருந்த இந்த வழக்கை, தற்போது தமிழ்நாடு சுகாதாரத் துறை முழு வேகத்தில் மீண்டும் கையில் எடுத்துள்ளது.
தமிழ்நாடு மருத்துவம் மற்றும் ஊரக நலப்பணிகள் இயக்குநர் சித்ரா தலைமையில் சிறப்பு விசாரணைக் குழு அமைக்கப்பட்டு, சம்பந்தப்பட்ட அனைவர்மீதும் கடுமையான சட்ட நடவடிக்கை எடுக்க உத்தரவிடப்பட்டுள்ளது. இதில் மருத்துவர்கள், செவிலியர்கள், மருத்துவப் பணியாளர்கள், இடைத்தரகர்கள் உள்ளிட்டோர் விசாரணை வளையத்திற்குள் கொண்டு வரப்பட்டுள்ளனர்.
கடந்த ஆட்சிக் காலத்தில் நாமக்கல் மாவட்டம் பள்ளிப்பாளையம், திருச்சி, ஈரோடு உள்ளிட்ட பகுதிகளில் ஏழை மற்றும் பொருளாதார ரீதியாக பாதிக்கப்பட்ட தொழிலாளர்களை குறிவைத்து, சட்டவிரோதமாக சிறுநீரகங்கள் அகற்றப்பட்டு விற்பனை செய்யப்பட்டதாக அதிர்ச்சி தகவல்கள் வெளியாகியிருந்தன. இந்த வழக்கில் ஏற்கெனவே மூன்று பேர் கைது செய்யப்பட்டுள்ளனர்.
புதிய அரசு பொறுப்பேற்ற பிறகு, இந்த விவகாரம் மீண்டும் முக்கியத்துவத்துடன் எடுத்துக்கொள்ளப்பட்டுள்ளதாக கூறப்படுகிறது. இதன்படி, நாமக்கல், திருச்சி, ஈரோடு மாவட்டங்களைத் தாண்டி தமிழகத்தின் பிற பகுதிகளிலும் இதுபோன்ற சட்டவிரோத நடவடிக்கைகள் நடைபெற்றுள்ளனவா என்பது குறித்து விசாரணை விரிவுபடுத்தப்பட்டுள்ளது.
மேலும், பாதிக்கப்பட்டவர்கள் எத்தனை பேர், அவர்கள் எந்த மருத்துவமனைகளில் சிகிச்சை பெற்றனர், யார் மூலம் இந்த வலையமைப்பில் சிக்கினர் போன்ற விவரங்களும் தீவிரமாக ஆய்வு செய்யப்படுகின்றன.
இந்த வழக்கில் மகாராஷ்டிரா மாநிலத்தைச் சேர்ந்த சிலருக்கும் தொடர்பு இருப்பதாக விசாரணையில் தெரியவந்துள்ளது. இதையடுத்து மகாராஷ்டிரா சிறப்பு புலனாய்வுக் குழு (SIT) போலீசார் திருச்சியில் முகாமிட்டு விசாரணை நடத்தியதாக கூறப்படுகிறது. அதன் பின்னரே தமிழக சுகாதாரத் துறை தனி சிறப்புக் குழுவை அமைத்து நடவடிக்கைகளை வேகப்படுத்தியது.
விசாரணையின் ஒரு பகுதியாக, திருச்சி பெரம்பூரில் உள்ள தனலட்சுமி சீனிவாசன் மருத்துவக் கல்லூரி மற்றும் திருச்சியில் செயல்பட்ட சித்தா மருத்துவமனையில் சிறுநீரக மாற்று அறுவை சிகிச்சைகளுக்கு தடை விதிக்கப்பட்டுள்ளது.
இந்த வழக்குடன் தொடர்புடையதாகக் கூறப்படும் ஜூலி என்பவரின் பெயரும் தற்போது மீண்டும் சர்ச்சையில் இடம்பிடித்துள்ளது. தேர்தல் பிரச்சாரத்தின் போது நடிகர் விஜய்யை கடுமையாக விமர்சித்து பேசினார் என்ற காரணத்தால் அவர் ஏற்கெனவே கவனத்தை ஈர்த்திருந்தார். தற்போது கிட்னி திருட்டு வழக்கில் அவருக்கும் தொடர்பு இருப்பதாக தகவல்கள் வெளியாகியுள்ளன.
வழக்கறிஞர் அட்வகேட் நெல்சன் சில முக்கிய ஆதாரங்களை அதிகாரிகளிடம் வழங்கியுள்ளதாக கூறப்படும் நிலையில், ஜூலியையும் காவல்துறை விரைவில் விசாரணைக்காக அழைக்கலாம் என தகவல்கள் தெரிவிக்கின்றன.
சுகாதாரத் துறை இயக்குநர் சித்ரா தலைமையிலான குழு தற்போது அனைத்து கோணங்களிலும் விசாரணையை தீவிரமாக முன்னெடுத்து வருகிறது. ஏழை மக்களை குறிவைத்து நடைபெற்றதாகக் கூறப்படும் இந்த சட்டவிரோத வலையமைப்பின் முழு பின்னணியையும் வெளிச்சத்துக்கு கொண்டு வர அதிகாரிகள் முயற்சி செய்து வருகின்றனர்.
இந்த வழக்கில் மேலும் பல அதிர்ச்சி தகவல்கள் வெளியாகும் என எதிர்பார்க்கப்படும் நிலையில், மருத்துவத் துறையின் மீதான பொதுமக்களின் நம்பிக்கையை மீட்டெடுக்க இந்த விசாரணை முக்கியமானதாக பார்க்கப்படுகிறது.
