Related Articles
மரணத்தை நெருங்கி மீண்ட மனிதன்: ‘அந்த 11 நிமிடங்களில்’ என்ன நடந்தது?
Adam Tapp என்ற கனடாவைச் சேர்ந்த அவசர மருத்துவ உதவியாளர், 2018ஆம் ஆண்டு ஏற்பட்ட ஒரு விபத்துக்குப் பிறகு மரணத்தின் எல்லையைத் தொட்டு மீண்ட அனுபவத்தை பகிர்ந்து உலகளவில் கவனம் ஈர்த்துள்ளார்.
பிப்ரவரி 28, 2018 அன்று, London, Ontario அருகே உள்ள தனது பணிப்பட்டறையில் நண்பருடன் மர வேலை செய்து கொண்டிருந்தார். அப்போது ‘லிச்சென்பெர்க்’ மின்சார கருவியை பயன்படுத்தியபோது, அதிலிருந்து பாய்ந்த உயர் மின்னழுத்தம் நேரடியாக அவரது உடலைத் தாக்கியது.
இந்த விபத்தில், அவரது இதயம் 11 நிமிடம் 5 வினாடிகள் செயலிழந்தது. உடனடியாக மருத்துவமனைக்கு கொண்டு செல்லப்பட்ட அவர், தீவிர சிகிச்சையில் அனுமதிக்கப்பட்டார். ஆரம்பத்தில் அவரை மீட்பது மிகவும் கடினம் என மருத்துவர்கள் தெரிவித்திருந்தனர்.
ஆனால் தீவிர முயற்சிக்குப் பிறகு, மருத்துவர்கள் அவரை மீண்டும் உயிர்ப்பித்தனர். அதற்கு முன், அவர் 8 மணி நேரம் கோமா நிலையில் இருந்தார்.
‘அந்த 11 நிமிடங்கள்’ – ஆடம் டாப் சொல்வது என்ன?
இந்த காலப்பகுதியில் தான் ஒரு வித்தியாசமான அனுபவத்தை சந்தித்ததாக ஆடம் டாப் கூறுகிறார்.
“மின்சாரம் பாய்ந்த நொடியில், உடலின் ஒவ்வொரு பகுதியும் சிதறிப்போகும் உணர்வு இருந்தது. அதற்குப் பிறகு, நான் முழுமையான அமைதிக்குள் சென்றேன். என் உடல் அங்கே இருந்தாலும், நான் வேறு ஒரு நிலைக்கு இழுக்கப்பட்டேன்,” என்று அவர் நினைவுகூர்கிறார்.
அவர் விவரிப்பதன்படி, அது ஆழமான இருட்டான இடமாக இருந்தது. எந்த மனித உருவங்களும் இல்லை; எந்த ஒலியும் இல்லை. ஆனால் சில நேரங்களில் வண்ணமயமான ஒளி அலைகள் மற்றும் அதிர்வுகள் அவரைச் சூழ்ந்ததாகக் கூறுகிறார்.
“அந்த அனுபவம், எல்லையற்ற அமைதியையும் ஒன்றிணைந்த உணர்வையும் கொடுத்தது. நாம் எங்கிருந்து வந்தோமோ, அங்கேயே திரும்பிச் செல்கிறோம் என்ற உணர்வு ஏற்பட்டது,” என அவர் தெரிவித்துள்ளார்.
மேலும், அந்த 11 நிமிடங்கள் அவருக்கு “பல ஆண்டுகள் போல” நீண்டதாக உணர்ந்ததாகவும் கூறுகிறார்.
மீண்டும் உயிர் திரும்பிய தருணம்
மருத்துவர்கள் டிஃபிப்ரிலேட்டர் மூலம் இதயத் துடிப்பை மீட்டெடுக்க முயன்றபோது, மீண்டும் மின்சாரம் தாக்குவது போன்ற உணர்வு ஏற்பட்டதாக அவர் கூறுகிறார். அதன் பின்னரே உடல் உணர்வு திரும்பியது.
அறிவியல் vs அனுபவம் – தொடரும் விவாதம்
இந்த சம்பவம் Near Death Experience (NDE) குறித்து உலகளவில் புதிய விவாதங்களை உருவாக்கியுள்ளது. சில விஞ்ஞானிகள் இதை மூளையில் ஏற்படும் இரசாயன மாற்றங்களால் விளக்க முயற்சிக்கின்றனர். ஆனால், ஆடம் டாப் போன்றோர் பகிரும் அனுபவங்கள், மரணத்திற்குப் பிறகான நிலை குறித்து ஆழமான கேள்விகளை எழுப்புகின்றன.
இன்று, ஆடம் டாப் தனது அனுபவத்தை பேட்டிகள் மற்றும் சமூக ஊடகங்கள் மூலம் பகிர்ந்து வருகிறார். அவரது கதை, “மரணம் ஒரு முடிவா அல்லது ஒரு மாற்றமா?” என்ற கேள்வியை மீண்டும் சிந்திக்க வைக்கிறது.
