Related Articles
தமிழ்நாட்டின் அரசு போக்குவரத்துக் கழகங்கள் கடுமையான நிதி நெருக்கடியில் சிக்கித் தத்தளித்து வருவதாக தமிழ்நாடு போக்குவரத்து கழக பாதுகாப்பு சங்கங்களின் கூட்டமைப்பு அதிர்ச்சி அறிக்கை வெளியிட்டுள்ளது. கடந்த ஐந்து ஆண்டுகளில் மட்டும் கழகங்களின் மொத்தக் கடன் 38,500 கோடி ரூபாயிலிருந்து 52,800 கோடி ரூபாயாக உயர்ந்துள்ளதாக தெரிவிக்கப்பட்டுள்ளது. மேலும், அரசு பேருந்துகள் தினமும் சுமார் 20 கோடி ரூபாய் நஷ்டத்தில் இயங்கி வருவதாகவும் கூறப்பட்டுள்ளது.
அறிக்கையின் படி, 2021-ஆம் ஆண்டில் 38,500 கோடியாக இருந்த கடன் தற்போது 52,800 கோடியை எட்டியுள்ளது. இதனால் மாதந்தோறும் சுமார் 610 கோடி ரூபாய் இழப்பு ஏற்படுவதாக சங்கங்கள் எச்சரித்துள்ளன.
அதே நேரத்தில், Fitness Certificate (FC) இல்லாமல் 5,480 அரசு பேருந்துகள் தினசரி சாலைகளில் இயங்கி வருவது பெரும் பாதுகாப்பு அச்சத்தை உருவாக்கியுள்ளது. கடந்த ஐந்து ஆண்டுகளில் மட்டும் FC இல்லாத பேருந்துகளின் எண்ணிக்கை 3,380 அதிகரித்திருப்பதாக கூறப்படுகிறது.
பெண்களுக்கான இலவசப் பயண திட்டமாக செயல்படுத்தப்பட்ட ‘விடியல் பயணம்’ அல்லது ‘பிங்க் பஸ்’ திட்டம் சமூக நலத் திட்டமாக பாராட்டப்பட்டாலும், இதனால் நேரடி வருவாய் இழப்பு 15,780 கோடி ரூபாய் ஏற்பட்டுள்ளதாக சங்கங்கள் தெரிவித்துள்ளன. மேலும், ஆட்சி மாற்றத்திற்குப் பிறகு அனைத்து அரசு பேருந்துகளிலும் பெண்களுக்கு இலவசப் பயணம் வழங்கும் “விஜய் வெற்றி பயணம்” திட்டம் அமல்படுத்தப்படலாம் என்ற தகவலும் வெளியாகியுள்ளது.
பொருளாதார நிபுணர்கள் எச்சரிக்கையாக, இந்த திட்டம் முழுமையாக நடைமுறைக்கு வந்தால் அடுத்த மூன்று ஆண்டுகளில் போக்குவரத்துக் கழகங்களின் மொத்தக் கடன் ஒரு லட்சம் கோடி ரூபாயை தாண்டும் அபாயம் இருப்பதாக தெரிவித்துள்ளனர். இதனால் துறை முழுவதும் கடும் நிதி சரிவை சந்திக்கக்கூடும் எனவும் கூறப்படுகிறது.
நிதி நெருக்கடியை சமாளிக்க முடியாத சூழலில், சுமார் 3,000 கிராமப்புற பேருந்து வழித்தடங்கள் நிரந்தரமாக நிறுத்தப்படும் அபாயம் இருப்பதாகவும் எச்சரிக்கை விடுக்கப்பட்டுள்ளது. இது கிராமப்புற மாணவர்களின் கல்வி, விவசாயிகளின் போக்குவரத்து மற்றும் அன்றாட வாழ்வாதாரத்தை கடுமையாக பாதிக்கும் என சமூக ஆர்வலர்கள் கவலை தெரிவித்துள்ளனர்.
இந்த சூழ்நிலையில், அரசு உடனடியாக வெள்ளை அறிக்கை வெளியிட்டு போக்குவரத்துக் கழகங்களின் உண்மை நிலையை மக்களிடம் விளக்க வேண்டும் என்று சங்கங்களும் சமூக ஆர்வலர்களும் கோரிக்கை விடுத்துள்ளனர். மேலும், இலவசப் பயண சலுகைகளை எல்லோருக்கும் வழங்குவதற்கு பதிலாக, வறுமைக் கோட்டுக்குக் கீழ் உள்ளவர்களுக்கு மட்டுமே வழங்க வேண்டும் என்ற கோரிக்கையும் முன்வைக்கப்பட்டுள்ளது.
அதோடு, அரசு ஊழியர்களுக்கான 9,800 கோடி ரூபாய் நிலுவைத் தொகையை உடனடியாக வழங்கி, பழைய பேருந்துகளை அகற்றி புதிய பேருந்துகளை வாங்க வேண்டும் என்றும் வலியுறுத்தப்பட்டுள்ளது.
“கவர்ச்சி அரசியலுக்காக ஒரு மாபெரும் பொதுக் கட்டமைப்பை சீரழிக்கலாமா?” என்ற கேள்வியை சமூக ஆர்வலர்கள் எழுப்பியுள்ளனர். தமிழ்நாட்டின் நரம்பு மண்டலமாகக் கருதப்படும் அரசு போக்குவரத்துத் துறையை காப்பாற்ற அரசு உடனடி நடவடிக்கை எடுக்க வேண்டும் என்ற எதிர்பார்ப்பு அதிகரித்துள்ளது.
