Related Articles
Tiruchirappalli : ஸ்ரீரங்கம் சட்டமன்றத் தொகுதியில் தமிழக வெற்றிக் கழகம் (தவெக) சார்பில் வெற்றி பெற்ற இளம் எம்எல்ஏ ரமேஷ், தொகுதி மக்களின் அடிப்படை பிரச்சனைகளை நேரடியாக களத்தில் இறங்கி தீர்க்கப் போவதாக உறுதியளித்துள்ளார். அவரது பேட்டி தற்போது அரசியல் வட்டாரங்களிலும் பொதுமக்களிடையும் கவனம் ஈர்த்துள்ளது.
தொகுதி மக்களுக்கு நன்றி தெரிவித்து பேசிய ரமேஷ், “ஸ்ரீரங்கம் தொகுதியில் இன்னும் பல கிராமங்களில் அடிப்படை வசதிகள் முழுமையாக கிடைக்காத நிலை உள்ளது. குறிப்பாக பட்டா பிரச்சனையால் ஏராளமான மக்கள் பல ஆண்டுகளாக அலைய வேண்டிய சூழலில் உள்ளனர். தேர்தல் பிரச்சாரத்தின் போது மக்கள் நேரடியாக கூறிய முக்கிய குறைகள் இவையே” என்று தெரிவித்தார்.
மேலும், “மக்கள் அரசு அலுவலகங்களுக்கு சென்று அங்கும் இங்கும் அலைய வேண்டிய நிலையை குறைப்பதே என் முதல் நோக்கம். ஒவ்வொரு கிராமத்திற்கும் நான் நேரில் சென்று மக்களின் குறைகளை கேட்டு, அவற்றை அதிகாரிகளிடம் கொண்டு சென்று உடனடி தீர்வு காண நடவடிக்கை எடுப்பேன்” என்றும் கூறினார்.
இதனுடன், தொகுதி மக்களுக்காக தனிப்பட்ட குறைதீர்ப்பு மையம் அமைக்கவும், பொதுமக்கள் எளிதில் தொடர்பு கொள்ள தனி செல்போன் எண் வழங்கவும், ஒவ்வொரு பகுதியிலும் எம்எல்ஏ அலுவலகம் தொடங்கவும் திட்டமிட்டுள்ளதாக அவர் தெரிவித்தார்.
அதேபோல், ஸ்ரீரங்கம் தொகுதி மக்களின் பிரச்சனைகளை பதிவு செய்து தீர்வு காண தனி இணையதளம் ஒன்றையும் அறிமுகப்படுத்தப் போவதாக கூறியுள்ளார். “மக்கள் உதவிக்காக அலைய வேண்டிய சூழலை நான் உருவாக்க மாட்டேன். ஏற்கெனவே சிரமத்தில் இருக்கும் மக்களுக்கு அரசு சேவைகள் எளிதாக கிடைக்க வேண்டும்” என அவர் வலியுறுத்தினார்.
தமிழக வெற்றிக் கழகத்தின் வெற்றியைப் பற்றி பேசிய ரமேஷ், “கடந்த பல ஆண்டுகளாக மக்கள் சந்தித்த அதிருப்தி மற்றும் அடிப்படை தேவைகள் புறக்கணிக்கப்பட்ட உணர்வே இந்த தேர்தல் முடிவில் பிரதிபலித்துள்ளது. மக்கள் எங்கள்மீது வைத்துள்ள நம்பிக்கையை செயலால் நிரூபிப்போம்” என்றார்.
இளம் வயதிலேயே அரசியலில் வெற்றி பெற்று தொகுதி மக்களிடம் நேரடி தொடர்புடன் செயல்படுவேன் என்ற ரமேஷின் அறிவிப்புகள், ஸ்ரீரங்கம் தொகுதியில் புதிய எதிர்பார்ப்பை உருவாக்கியுள்ளன.
