செல்போனில் ரீல்ஸ் வீடியோக்களைப் பார்த்ததற்காக பெற்றோரால் கடுமையாகக் கண்டிக்கப்பட்டு, வீட்டை விட்டு வெளியேறிய மூன்று பள்ளி மாணவிகளை சென்னை போலீசார் பத்திரமாகக் கண்டுபிடித்து, அவர்களது பெற்றோரிடம் அனுப்பி வைத்தனர். இந்த சம்பவம் பொதுமக்களிடையே பெரும் அதிர்ச்சியையும், பீதியையும் ஏற்படுத்தியுள்ளது.
பாண்டி பஜார் பகுதியில் வசிப்பவர்களான 10-ஆம் மற்றும் 11-ஆம் வகுப்பு மாணவிகளான நிஷா, இந்திரா, மேக்னா (பெயர்கள் மாற்றப்பட்டவை) ஆகியோர், தொடர்ந்து செல்போனில் ரீல்ஸ் வீடியோக்களைப் பார்த்து, படிப்பில் கவனம் செலுத்தாமல் இருந்ததால், அவர்களது பெற்றோர் கடுமையாகக் கண்டித்தனர்.
இந்தக் கண்டனத்தைத் தாங்க முடியாமல், மூன்று மாணவிகளும் வீட்டை விட்டு வெளியேறி, பரங்கிமலை ரயில் நிலையத்தில் சோகமாக அமர்ந்திருந்தனர்.ரயில் நிலையத்தில் காவலர் பணியில் இருந்த போது, செய்வதறியாமல் அமர்ந்திருந்த இந்த மாணவிகளைப் பார்த்து விசாரித்தனர்.
ஆரம்பத்தில் மாணவிகள் முன்னுக்கு பின்னுக்கு முரண்படும் தகவல்களைக் கூறியதால், போலீசார் அவர்களை அருகிலுள்ள காவல் நிலையத்திற்கு அழைத்துச் சென்றனர். அங்கு நடத்தப்பட்ட விரிவான விசாரணையில், ரீல்ஸ் வீடியோக்களைப் பொழுதுபோக்காக வைத்துக்கொண்டு, படிப்பைப் புறக்கணித்ததே இந்தச் சம்பவத்திற்குக் காரணம் எனத் தெரியவந்தது.
“மாணவிகள் மிகவும் இளம் வயதினர். சமூக ஊடகங்களின் ஈர்க்கலில் மூழ்கி, பெற்றோரின் அன்பையும் அக்கறையையும் புரிந்துகொள்ளாமல், உணர்ச்சிவசப்படுகின்றனர். இது போன்ற சம்பவங்கள் அதிகரித்து வருவதால், பெற்றோரும், ஆசிரியர்களும் சமூக ஊடக பயன்பாட்டை மேற்பார்வையிட வேண்டும்,” என விசாரணையை நடத்திய போலீஸ் அதிகாரி ஒருவர் தெரிவித்தார்.
மாணவிகளுக்கு போலீசார் தேவையான எச்சரிக்கை வார்த்தைகளை வழங்கியதன் பிறகு, அவர்களது பெற்றோர்களை வரவழைத்தனர். பெற்றோருக்கும் மாணவிகளுக்கும் இடையே அறிவுரை வழங்கி, குடும்ப உறுப்பினர்களிடையே பரஸ்பர புரிதலை வலியுறுத்தினர்.
இறுதியாக, மாணவிகளை அவர்களது பெற்றோரிடம் பாதுகாப்பாக அனுப்பி வைத்தனர்.இச் சம்பவத்தை அறிந்த பொதுமக்கள் அதிர்ச்சியடைந்துள்ளனர். “இந்த மூன்று பேர் சமூக விரோதிகளின் கையில் சிக்கியிருந்தால் என்ன நடந்திருக்கும்? இன்றைய காலத்தில் சமூக ஊடகங்கள் இளைஞர்களை எவ்வளவு எளிதில் வழி தவறச் செய்கின்றன,” என ஒரு உள்ளூர் குடியிருப்பாளர் கூறினார்.
இது போன்ற சம்பவங்கள், பெற்றோருக்கும் குழந்தைகளுக்கும் இடையே தொடர்பை வலுப்படுத்துவதன் அவசியத்தை மீண்டும் நினைவூட்டுகிறது.போலீசார், இதுபோன்ற சம்பவங்கள் தொடர்ந்து ஏற்படுவதைத் தடுக்க, பள்ளிகளுடன் இணைந்து விழிப்புணர்வு கூட்டங்களை நடத்த திட்டமிட்டுள்ளனர்.
