கள்ளக்குறிச்சி மாவட்டம் உளுந்தூர்பேட்டை அருகே கீழக்குப்பம் வேலூர் கிராமத்தில் தீபாவளி பண்டிகை முன்னரே நடந்த ஒரு சம்பவம் கொடூரமான முடிவை எட்டியது.
லாரி ஓட்டுனரான குணசேகரனின் மனைவி மகேஸ்வரி (35), தனது 14 வயது சிறுவனான இரண்டாவது மகனால் அவரது தாலி கழட்டப்பட்டு அரங்கேறிய கொடூரத்திற்கு இரையானார்.
மகேஸ்வரியின் மகன் கொடுத்த அதிர்ச்சி வாக்குமூலத்தின் அடிப்படையில் போலீசார் வழக்கை சந்தேக மரணத்தில் இருந்து கொலை வழக்காக மாற்றி, அவரை சிறுவர் சீர்திருத்தப் பள்ளிக்கு அனுப்பியுள்ளனர்.
என்ன நடந்தது..? வாங்க பாக்கலாம். கடந்த 17 ஆண்டுகளுக்கு முன் குணசேகரன் (அய்யனூர்) மற்றும் மகேஸ்வரி (வேலூர்) இடையே திருமணம் நடைபெற்றது. இந்தத் தம்பதிக்கு இரண்டு மகன்கள் உள்ளனர். லாரி ஓட்டுநராகப் பணியாற்றும் குணசேகரன், வேலைக்காக வெளியூர்களுக்குச் சென்று சில நாட்களுக்குப் பிறகு வீடு திரும்புவார்.
அப்போது வீட்டு செலவுகளுக்கும், குழந்தைகளுக்கான தின்பண்டங்களுக்கும் போதுமான அளவு பணம் மற்றும் பொருட்களை வாங்கி வருவதால், குடும்பத்தில் பொதுவாக அமைதி நிலவியதாக அக்கம் பக்கத்தினர் தெரிவித்தனர். இருப்பினும், தம்பதிக்கிடையே அடிக்கடி சிறு சிறு பிரச்சனைகள் ஏற்பட்டதாகவும், அவை பெரிதடையாமல் தீர்க்கப்பட்டதாகவும் கூறப்படுகிறது.
ஆனால், தீபாவளி பண்டிகைக்காக குணசேகரன் தனது மனைவி மற்றும் மகன்களுக்கு புதிய உடைகள் வாங்கி வந்தார். அக்டோபர் 19-ஆம் தேதி, மகேஸ்வரியைப் புதிய சேலையை அணிவதற்கு நீண்டு கூறிய குணசேகரன், அவர் மறுத்ததால் கோபமடைந்து அவரை கடுமையாக அடித்ததாகக் கூறப்படுகிறது.
இதனால் ஆத்திரமடைந்த மகேஸ்வரி, கோபத்தில் வீட்டை விட்டு வெளியேறி அருகிலுள்ள வயல் பகுதிக்குச் சென்றார். வெகு நேரமாகியும் திரும்பாததால், அக்கம் பக்கத்தினர் அவரைத் தேடச் சென்றபோது, வயல் நிலத்தில் மூச்சுத்திணறி, உயிரிழந்த நிலையில் மகேஸ்வரி கிடந்ததைப் பார்த்து அதிர்ச்சியடைந்தனர்.
உடனடியாக உறவினர்களுக்கும் திருநாவலூர் காவல் நிலையத்துக்கும் தகவல் அளிக்கப்பட்டது.மகேஸ்வரியின் உடலை கைப்பற்றிய போலீசார், சந்தேக மரணம் என்ற புகாரின் அடிப்படையில் விசாரணைத் தொடங்கினர். உடலை விழுப்புரம் முண்டியம்பாக்கம் அரசு மருத்துவக் கல்லூரி மருத்துவமனைக்கு அனுப்பி, பிரேதப் பரிசோதனை செய்தனர்.
பரிசோதனையில், கழுத்தில் நெறிப்பு அடையாளங்கள் கண்டெடுக்கப்பட்டதால், கொலை என்று உறுதிப்படுத்தப்பட்டது. விசாரணையின்போது, உடல் அருகே கிடந்த சட்டைப் பட்டன்கள் போலீசாருக்கு துருப்பு சீட்டாக அமைந்தது. இவை குணசேகரன் அணிந்திருந்த சட்டையின் பிராண்ட் பட்டன்களுடன் ஒத்திருந்தது.
மேலும், தீபாவளிக்காக அவர் தனது மகன்களுக்கும் அதே பிராண்ட் சட்டைகளை வாங்கிக் கொடுத்திருந்தது தெரியவந்தது. இதன் அடுத்தப் படியாக, குணசேகரனின் இரு மகன்களிடமும் விரிவான விசாரணை நடத்திய போலீசாருக்கு அதிர்ச்சி காத்திருந்தது.
கணவர் குணசேகரனின் சட்டையில் இருந்த பட்டன்கள் நல்ல நிலையில் சட்டையிலேயே இருந்தது. ஆனால், மகேஸ்வரின் இரண்டாவது மகன் 14 வயது சிறுவனின் சட்டையில் இரண்டு பட்டன்கள் இல்லாததைக் கண்டறிந்து அதிர்ந்தனர்.
தீவிர விசாரணையில் சிறுவன் கொடுத்த வாக்குமூலம் அதிர்ச்சியை ஏற்படுத்தியது. “தீபாவளிக்கு முந்தைய நாள் அம்மாவுக்கும் அப்பாவுக்கும் சண்டை ஏற்பட்டது. அப்பா அம்மாவை அடித்தார். நான் அதைத் தடுக்கவில்லை. அதைப் பார்த்து அம்மா, உன் அப்பா என்னை அடிக்கும் போது ஏன் கேட்கவில்லை என்று கூறி அடித்தார்.
ஆத்திரமடைந்த நான், அம்மா வயல்வழியாக நடந்து செல்லும்போது பின்தொடர்ந்து சென்று, அவரைக் கீழே தள்ளினேன். பின்னர் கழுத்தில் கால் வைத்து மிதித்து, தாலியை கழட்டி அதை வைத்தே கழுத்தை இறுக நெறித்துக் கொன்றேன்,” என்று சிறுவன் அழுதுகொண்டே வாக்குமூலம் அளித்தார்.
இந்த வாக்குமூலத்தின் அடிப்படையில், போலீசார் வழக்கை சந்தேக மரணத்தில் இருந்து IPC 302 (கொலை) பிரிவின் கீழ் கொலை வழக்காக மாற்றினர். குணசேகரன் விடுதலை செய்யப்பட்டாலும், சிறுவன் கைது செய்யப்பட்டு உளுந்தூர்பேட்டை குற்றவியல் நீதிபதியிடம் ஆஜர்படுத்தப்பட்டு, கடலூர் சிறுவர் சீர்திருத்தப் பள்ளிக்கு அனுப்பி வைக்கப்பட்டார்.
விசாரணையைத் தீவிரப்படுத்தியுள்ள திருநாவலூர் போலீசார், குடும்ப உறுப்பினர்கள் மற்றும் அக்கம் பக்கத்தினரிடம் மேலும் விசாரணை நடத்தி வருகின்றனர்.இச் சம்பவம் கிராம மக்களிடையே பெரும் அதிர்ச்சியையும், குடும்பப் பிரச்சனைகளின் கொடூர விளைவுகளைப் பற்றிய விழிப்புணர்வை ஏற்படுத்தியுள்ளது.
“இது போன்ற சிறு சண்டைகள் பெரிய விளைவுகளுக்கு வழிவகுக்கலாகாது. குடும்ப உறுப்பினர்கள் உரையாடலில் தீர்வு காண வேண்டும்,” என்று உள்ளூர் கிராமத் தலைவர்கள் கூறியுள்ளனர். போலீசார், மேலும் விவரங்கள் வெளியாகும் வரை விசாரணையைத் தொடருவதாகத் தெரிவித்துள்ளனர்.
அதே நேரம், இது தான் நடந்த உண்மையா..? அல்லது, வழக்கை திசை திருப்பி சிறுவன் சிக்க வைக்கப்பட்டானா..? என்ற கோணத்திலும் இணைய வாசிகள் கேள்விகளை எழுப்பி வருகின்றனர்.
